Gëzohu gjithmonë në Zotin

SHËRBESA E MËNGJESIT

Në emrin e Atit e Birit edhe Shpirtit të Shenjtë. Amin.

Lavdi më Ty, o Krisht Perëndia ynë, lavdi më Ty.

O Mbret qiellor, Ngushëllimtar, Shpirt i së vërtetës, që ndodhesh kudo dhe i mbush të gjitha, thesar i të mirave dhe dhurues jete; eja dhe qëndro ndër ne dhe pastrona nga çdo njollë dhe shpëto, o i Mirë, shpirtrat tanë. Amin.

Shenjt Perëndi, Shenjt i fuqishëm, Shenjt i pavdekshëm, mëshirona. (3 herë)

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Trini e Tërëshenjtë, mëshirona; o Zot, falna mëkatet tona; o Zot i madh, ndjei paudhësitë tona; o i Shenjtë, vështro dhe shëro sëmundjet tona, për emrin tënd.

Mëshiro, o Zot. (3 herë)

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Ati ynë që je në qiejt, u shenjtëroftë emri yt, ardhtë mbretëria jote, u bëftë dëshira jote si në qiell ashtu edhe mbi dhe. Bukën tonë të përditshme jepna neve sot; dhe falna fajet tona, sikurse edhe ne ua falim fajtorëve tanë; dhe mos na shtjer në ngasje, po shpëtona nga i ligu.

Prifti: Se jotja është mbretëria dhe fuqia dhe lavdia, e Atit, e Birit dhe e Shpirtit të Shenjtë, tani e përherë e në jetë të jetëve.

Populli: Amin.

Si u ngritëm prej gjumit, Ty po të biem në gjunjë, o i Mirë, dhe himnin e Engjëjve po të thërresim, o i fortë: Shenjt, Shenjt, Shenjt je, o Perëndi, me anën e Hyjlindëses mëshirona.

Lavdi Atit e Birit edhe Shpirtit të Shenjtë.

Pasi më ngrite prej shtratit dhe prej gjumit, o Zot, ndriçomë mendjen, dhe hapmi zemrën dhe buzët që të të himnojnë Ty, o Trini e Shenjtë: Shenjt, Shenjt, Shenjt je, o Perëndi, me anën e Hyjlindëses mëshirona.

Tani e përherë e në jetë të jetëve. Amin.

Papritur Gjykatësi do të vijë dhe veprat e secilit do të zbulojë, por le të thërresim me frikë në mes të natës: Shenjt, Shenjt, Shenjt je, o Perëndi, me anën e Hyjlindëses mëshirona.

Lutje  falënderimi  me  përgjërim

Duke u ngritur prej gjumit të falënderoj Ty, o Trini e Shenjtë, se nga mirësia jote e madhe dhe nga zemërgjerësia, nuk je zemëruar me mua përtacin e mëkatarin, as më bëre të humbas bashkë me paudhësitë e mia, por nga njeridashja si zakonisht, kur isha në dëshpërim më ngrite, që të qëndroj në mëngjes e të lavdëroj pushtetin tënd. Dhe tani ndriçomi sytë e mendjes, çelma gojën për të mësuar fjalët e tua, për të kuptuar urdhërimet e tua, për të bërë dëshirën tënde, për të të psalur me lavdërim zemre dhe për të himnuar emrin tënd të Tërëshenjtë, të Atit, dhe të Birit dhe të Shpirtit të Shenjtë, tani e përherë e në jetë të jetëve. Amin.

Lavdi Ty, o Mbret, Perëndi i tërëfuqishëm, që me kujdesin tënd hyjnor dhe njeridashës, më bëre të denjë, mua mëkatarin e të padenjin, të ngrihem prej gjumit e të hyj në shtëpinë tënde të shenjtë. Prano, o Zot, edhe zërin e lutjes sime, si zërin e Fuqive të tua të shenjta dhe shpirtërore; dhe me zemër të pastër dhe me shpirt përulësie, të të sjell lavdërimin me buzët e mia të ndyra; që të bëhem edhe unë pjesëmarrës bashkë me virgjëreshat e urta, në shkëlqimin gazmor të shpirtit tim dhe të të lavdëroj Ty, Perëndinë-Fjalë, që lavdërohesh bashkë me Atin e me Shpirtin e Shenjtë. Amin.

Simboli i Besimit 

Besoj në një Perëndi, Atë të tërëfuqishëm, krijues të qiellit edhe të dheut dhe të gjitha të dukurave dhe të padukurave.

Dhe në një Zot, Jisu Krishtin, Birin e Perëndisë, të Vetëmlindurin, që lindi prej Atit përpara gjithë shekujve. Dritë prej drite, Perëndi të vërtetë prej Perëndie të vërtetë, të lindur, jo të bërë, që ka të qenët një me Atin, me anën e të cilit u bënë të gjitha. Që për ne njerëzit dhe për shpëtimin tonë, zbriti prej qiejve dhe u trupëzua prej Shpirtit të Shenjtë dhe Virgjëreshës Mari dhe u bë njeri. Dhe u kryqëzua për ne në kohën e Pontit Pilat, dhe pësoi e u varros. Dhe u ngjall të tretën ditë sipas Shkrimeve. Dhe u ngjit në qiejt dhe rri në të djathtë të Atit. Dhe do të vijë përsëri me lavdi të gjykojë të gjallët dhe të vdekurit, mbretëria e të cilit nuk do të ketë mbarim.

Dhe në Shpirtin e Shenjtë, Zot, Jetëbërës, që buron prej Atit, që adhurohet e lavdërohet bashkë me Atin e me Birin, që foli me anën e profetëve.

Në një Kishë të shenjtë, Katholike dhe apostolike.

Pohoj një pagëzim për ndjesën e mëkateve.

Pres ngjalljen e të vdekurve.

Dhe jetën e ardhshme të amshuar. Amin.

O Zot, shpëto popullin tënd dhe beko trashëgimin tënd. Dhuroju shpresëtarëve fitore mbi barbarët dhe ruaje shtetin tënd me anën e Kryqit tënd.

Lavdi Atit e Birit edhe Shpirtit të Shenjtë.

Ti që mbi Kryqin u mbërtheve me dashje, shtetit të ri që ka emrin tënd dhuroi dhembshuritë e tua, o Krisht Perëndi. Ngazëlloi me fuqinë tënde krerët tanë besnikë, duke u falur fitore kundër armiqve, paçin përkrahjen tënde, armë paqeje, trope të pamposhtur.

Tani e përherë e në jetë të jetëve. Amin.

O Hyjlindëse e mirë, e tërëhimnuar, mbrojtje e frikshme dhe e paturpëruar, mos i përbuz lutjet tona; mbështete shtetin e orthodhoksëve, shpëtoi ata që i urdhërove të mbretërojnë dhe dhuroju nga qiejt fitoren; se ti linde Perëndinë, o e vetmja e bekuar.

Gjashtë psalmet

Psalmi 3

O Zot, sa u shumuan ata që më shtrëngojnë: Shumë ngrenë krye kundër meje.

Shumë i thonë shpirtit tim: s’ka shpëtim për atë te Perëndia i tij.

Por Ti, o Zot, je përkrahësi im, lavdia ime, dhe ai që më ngre kryet lart.

Me zërin tim i thirra Zotit dhe më dëgjoi prej malit të tij të shenjtë.

Unë rashë e fjeta, u ngrita se Zoti do të më ndihmojë.

Nuk do të frikësohem prej popullit të panumërt që më mësyjnë së bashku nga të gjitha anët.

Ngrihu, o Zot, shpëtomë, o Perëndia im; se Ti godite të gjithë ata që kot janë armiqtë e mi, dërrmon dhëmbët e mëkatarëve.

Nga Zoti është shpëtimi.  Bekimi yt qoftë mbi popullin tënd.

Dhe përsëri:

Unë rashë e fjeta, u ngrita se Zoti do të më ndihmojë.

Psalmi 37

O Zot, mos më qorto në zemërimin tënd, as mos më mundo në mërinë tënde.

Se shigjetat e tua m’u ngulën dhe dora jote rëndon mbi mua.

Nuk ka shërim në trupin tim nga shkaku i zemërimit tënd; nuk ka paqe ndër eshtrat e mia nga shkaku i mëkateve të mia.

Se paudhësitë e mia kapërcyen kryet tim, si barrë e rëndë rënduan mbi mua.

U qelbën dhe u kalbën plagët e mia për shkak të marrëzisë sime.

U bëra i ngratë dhe u kërrusa krejt, gjithë ditën ecja i vrerët.

Se të brendshmet e mia u mbushën me nxehtësi dhe nuk ka shërim në trupin tim.

U dobësova dhe u këputa fare, ulërij nga shtrëngimi i zemrës sime.

O Zot, e gjithë dëshira ime është përpara teje dhe psherëtima ime nuk fshihet nga Ti.

Zemra ime u trondit, fuqia ime më la dhe dritën e syve të mi, as atë s’e kam.

Miqtë dhe të afërmit e mi u afruan dhe qëndruan kundrejt meje, ndërsa farefisi im qëndruan larg.

Dhe ata që kërkojnë shpirtin tim, ngrehin kurthe, edhe ata që më duan të keqen, flasin kotësi dhe tërë ditën mendojnë dinakëri.

Por unë nuk dëgjoja si një i shurdhër dhe nuk e çelja gojën si një memec.

Dhe u bëra porsi një njeri që nuk dëgjon dhe që nuk ka përgjigje në gojën e tij.

Se shpresova te Ti, o Zot, Ti do të më dëgjosh, o Zot, Perëndia im.

Se thashë: Mos u gëzofshin kurrë për mua armiqtë e mi; dhe kur më rrëshqasin këmbët ata mburren përpara meje.

Jam gati për të rënë, dhe dhimbja ime është përherë përpara meje.

Se unë rrëfej paudhësinë time dhe më vjen rëndë për mëkatin tim.

Por armiqtë e mi rrojnë edhe janë më të fortë se unë, dhe u shumuan ata që më urrejnë padrejtësisht.

Edhe ata që ma shpërblejnë të mirën me të keqe shpifin kundër meje, sepse unë ndjek të mirën.

Mos më neverit, o Zot, Perëndia im, mos u largo prej meje.

Nxito të më ndihmosh, o Zot i shpëtimit tim.

Dhe përsëri:

Mos më neverit, o Zot, Perëndia im, mos u largo prej meje.

Nxito të më ndihmosh, o Zot i shpëtimit tim.

Psalmi 62

O Perëndi, Perëndia im; te Ti shpejtoj që në mëngjes.

Shpirti im ka etje për Ty dhe veçan trupi im, si në dhe të shkretë, të pakaluar dhe pa ujë.

Kështu t’u paraqita në shenjtëroren, që të shoh fuqinë tënde dhe lavdinë tënde.

Se përdëllimi yt është më i mirë se jeta dhe buzët e mia do të të lavdërojnë.

Kështu do të të bekoj në jetën time, dhe në emrin tënd do të ngre duart e mia.

Posi prej të majmi dhe prej dhjami le të nginjet shpirti im dhe me buzë ngazëllimi do të të lavdërojë goja ime.

Sa herë të kujtoja në shtratin tim, të kisha ndër mend gjer në mëngjes.

Se u bëre ndihmësi im dhe në hijen e krahëve të tu do të ngazëllohem.

Shpirti im u ngjit pas teje dhe mua më ndihmoi e djathta jote.

Po ata që kërkuan më kot shpirtin tim, do të hyjnë në anët më të poshtme të dheut.

Do të kositen nga fuqia e shpatës dhe do të bëhen pre dhelprash.

Dhe mbreti do të ngazëllehet më Perëndinë, do të lavdërohet cilido që betohet në emrin e tij, se u zu goja e atyre që flasin padrejtësi.

Dhe përsëri:

Të kisha ndër mend gjer në mëngjes se u bëre ndihmësi im dhe në hijen e krahëve të tu do të ngazëllohem.

Shpirti im u ngjit pas teje dhe mua më ndihmoi e djathta jote.

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Aliluia, aliluia, aliluia, lavdi më Ty, o Perëndi. (3 herë)

Mëshiro, o Zot. (3 herë)

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Psalmi 87

O Zot, Perëndi i shpëtimit tim, ditë e natë thirra përpara teje.

Le të arrijë falja ime përpara teje, vëri veshin lutjes sime.

Se shpirti im u mbush me të liga dhe jeta ime iu afrua ferrit.

U numërova me ata që zbresin në gropë, u bëra si njeri pa ndihmë, ndër të vdekurit i lirë. Posi të vrarët e shtrirë në varr, të cilët Ti nuk i kujtove më, po u flakën prej dorës sate.

Më vure në gropën më të thellë, në errësirën dhe në hijen e vdekjes.

Mbi mua rëndoi zemërimi yt dhe tërë valët e tua i solle mbi mua.

Largove prej meje të njohurit e mi, të cilët më morën për njeri të ndyrë.

U mbylla dhe s’mund të dal; sytë e mi u dobësuan nga vuajtjet; te Ti, o Zot, thirra tërë ditën, te Ti ndeva duart e mia.

Mos do të bësh çudira në të vdekurit, apo të vdekurit do të ngrihen dhe do të të lavdërojnë?

Mos ka për të treguar kush, mëshirën tënde në varr, dhe të vërtetën tënde në humbje?

Mos do të njihen çuditë e tua në errësirë, dhe drejtësia jote në dhe të harruar?

Por unë te Ti thirra, o Zot, dhe lutja ime te Ti do të arrijë që në mëngjes.

Përse e hedh tutje shpirtin tim, o Zot, dhe e kthen fytyrën tënde prej meje?

Fatkeq jam unë dhe i munduar që në të ritë tim, dhe kur u lartësova, u ula dhe u hutova.

Mbi mua kaluan zemërimet e tua dhe kërcënimet e tua më tronditën krejt.

Tërë ditën më rrethuan si uji dhe më mbyllën nga të gjitha anët.

Largove prej meje çdo mik dhe të afërm, dhe të njohurit e mi për shkak të fatkeqësisë.

Dhe përsëri:

O Zot, Perëndi i shpëtimit tim, ditë e natë thirra përpara teje.

Le të arrijë falja ime përpara teje, vëri veshin lutjes sime.

Psalmi 102

Beko Zotin, o shpirti im, edhe ti, o zemra ime, emrin e tij të shenjtë.

Beko Zotin, o shpirti im, dhe mos harro tërë mirësitë e tij.

Atë që fal gjithë paudhësitë e tua, atë që shëron gjithë sëmundjet e tua.

Atë që shpëton jetën tënde prej prishjes, atë që të kurorëzon me mëshirë dhe dhembshuri.

Atë që ta mbush dëshirën me të mira; atë që përtërit të ritë e tu si të shqiponjës.

Zoti tregon mëshirë dhe u jep të drejtë atyre që u bëhet padrejtësi.

Ia bëri të njohura udhët e tij Moisiut, dëshirat e tij bijve të Izraelit.

Zoti është i dhembshur dhe përdëllyes, zemërgjerë e mëshirëplotë; nuk zemërohet përgjithmonë, as mban mëri përjetë.

Nuk veproi sipas paudhësive tona, as na e shpërbleu sipas mëkateve tona.

Sa e madhe është lartësia e qiellit nga dheu, aq e madhe është mëshira që tregon Zoti për ata që ia kanë frikën.

Sa larg është lindja nga perëndimi, aq i largoi prej nesh paudhësitë tona.

Sikurse atit i dhimbsen të bijtë, ashtu edhe Zotit i dhimbsen ata që ia kanë frikën.

Se ai e di se jemi krijuar dhe sjell ndër mend se jemi baltë.

Ditët e njeriut janë si bari, lulëzon porsi lulja e fushës.

Se fryn era mbi të dhe s’është më, dhe nuk dihet më se ku e ka pasur vendin.

Po mëshira e Zotit, jetë pas jete, është mbi ata që ia kanë frikën, dhe drejtësia e tij mbi bijtë e bijve, që ruajnë dhiatën e tij dhe që mbajnë ndër mend porositë e tij për t’i zbatuar.

Zoti e vendosi fronin e tij në qiell, dhe mbretëria e tij zotëron mbi të gjithë.

Bekoni Zotin gjithë ju engjëjt e tij, të fortë nga fuqia, që zbatoni porositë e tij, duke dëgjuar zërin e fjalëve të tij.

Bekoni Zotin gjithë ju fuqitë e tij, ju shërbyesit e tij, që zbatoni dëshirën e tij.

Bekoni Zotin gjithë ju veprat e tij, në çdo vend të sundimit të tij, beko Zotin, o shpirti im.

Dhe përsëri:

Në çdo vend të sundimit të tij, beko Zotin, o shpirti im.

Psalmi 142

O Zot, dëgjo faljen time, veri veshin lutjes sime sipas së vërtetës sate, dëgjomë sipas drejtësisë sate.

Dhe mos hyr në gjyq me shërbëtorin tënd, se asnjë i gjallë nuk do të dalë i drejtë përpara teje.

Se armiku ma ndoqi shpirtin, dhe ma rrëzoi jetën përdhe.

Më vuri në vende të errëta, si të vdekurit prej kohe, shpirti m’u trishtua dhe zemra m’u trondit.

Kujtova ditët e lashta, mendova gjithë veprat e tua, sillja ndër mend punët e duarve të tua.

I shtriva duart drejt teje; shpirti im ka etje për Ty si toka e thatë.

Dëgjomë shpejt, o Zot, m’u zu fryma, mos e kthe mënjanë fytyrën tënde prej meje, që të mos bëhem si ata që zbritën në varr.

Bëj që të dëgjoj përdëllimin tënd në mëngjes se më Ty shpresova.

Tregomë, o Zot, udhën ku duhet të eci, se më Ty e kam varur shpirtin.

Shpëtomë prej armiqve të mi, o Zot, se te Ti kërkova strehë.

Mësomë të bëj dëshirën tënde se Ti je Perëndia im.

Fryma jote e mirë, do të më udhëheqë në vend të drejtë. Për emrin tënd, o Zot, gjallëromë.

Sipas drejtësisë sate nxirr shpirtin tim nga trishtimi, dhe sipas mëshirës sate shfarosi armiqtë e mi, dhe shkatërroi të gjithë ata që hidhërojnë shpirtin tim se unë jam shërbëtori yt.

Dhe përsëri:

Dëgjomë, o Zot, sipas drejtësisë sate dhe mos hyr në gjyq me shërbëtorin tënd.

Dëgjomë, o Zot, sipas drejtësisë sate dhe mos hyr në gjyq me shërbëtorin tënd.

Fryma jote e mirë, do të më udhëheqë në vend të drejtë.

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Aliluia, aliluia, aliluia, lavdi më Ty, o Perëndi. (3 herë)

O Zot shpresa jonë, lavdi më Ty.

Perëndi është Zoti dhe u shfaq ndër ne, i bekuar është ai që vjen në emrin e Zotit.

Varg: Lavdëroni Zotin dhe thirrni emrin e tij të shenjtë.

Perëndi është Zoti dhe u shfaq ndër ne, i bekuar është ai që vjen në emrin e Zotit.

Varg: Të gjitha kombet më rrethuan dhe me emrin e tij i mposhta.

Perëndi është Zoti dhe u shfaq ndër ne, i bekuar është ai që vjen në emrin e Zotit.

Varg: Prej Zotit u bë kjo dhe është e çuditshme në sytë tanë.

Perëndi është Zoti dhe u shfaq ndër ne, i bekuar është ai që vjen në emrin e Zotit.

Psalmi 50

Përdëllemë, o Perëndi, sipas përdëllimit tënd të madh dhe sipas dhembshurive të tua të shumta shuaje paudhësinë time.

Lajmë krejt prej paudhësisë sime dhe pastromë prej mëkatit tim.

Se unë e njoh paudhësinë time dhe mëkati im është përpara meje kurdoherë.

Te Ti vetëm mëkatova dhe të keqen e bëra përpara teje, kështu që Ti je i drejtë në fjalët e tua dhe i kthjellët në gjykimin tënd.

Se ja tek u zura në paudhësi, dhe në mëkate më lindi nëna ime.

Se ja te deshe të vërtetën, të patreguarat dhe të fshehtat e urtësisë sate m’i tregove.

Spërkatmë me hisop, dhe do të pastrohem, lajmë dhe do të bëhem më i bardhë se dëbora.

Bëmë të dëgjoj gëzim e ngazëllim, dhe do të më gëzohen eshtrat e dobësuara.

Ktheje fytyrën tënde nga mëkatet e mia, dhe shuaji gjithë paudhësitë e mia.

Krijo zemër të pastër tek unë, o Perëndi, dhe përtërit frymë të drejtë në thellësitë e zemrës sime.

Mos më hidh larg fytyrës sate, dhe mos e hiq prej meje shpirtin tënd të shenjtë.

Jepma prapë ngazëllimin e shpëtimit tënd dhe forcomë me frymë sunduese.

Do t’u mësoj  të paligjve udhët e tua, dhe të pabesët do të kthehen te Ti.

Shpëtomë prej gjakrash, o Perëndi, Perëndia i shpëtimit tim, gjuha ime do të lavdërojë me gëzim drejtësinë tënde.

O Zot, çel buzët e mia, dhe goja ime do të lëçitë lavdinë tënde.

Se po të kishe dashur therore do të kisha prurë, por Ty s’të pëlqejnë therore me djegie të plotë.

Therore ndaj Perëndisë është shpirti i dërrmuar; zemrën e dërrmuar dhe të përulur Perëndia nuk do ta përbuzë.

Bëji të mirë, o Zot, Sionit, sipas mirëdashjes sate; dhe le të ndërtohen muret e Jerusalemit.

Atëherë do të të pëlqejnë therore drejtësie, dhurata dhe therore me djegie të plotë.

Atëherë do të sjellin viça mbi altarin tënd.

Madhështimet e Hyjlindëses       

Varg: Shpirti im madhëron Zotin dhe fryma ime u ngazëllua për Perëndinë, Shpëtimtarin tim.

Më të nderuarën se Keruvimet dhe më të lavdëruarën pa krahasim se Serafimet, që pa u cenuar linde Fjalën Perëndi, me të vërtetë Hyjlindëse, ty të madhërojmë.

Varg: Se hodhi sytë mbi përulësinë e shërbëtores së tij, se ja që tani e tutje gjithë brezat do të më lumurojnë.

Më të nderuarën se Keruvimet dhe më të lavdëruarën pa krahasim se Serafimet, që pa u cenuar linde Fjalën Perëndi, me të vërtetë Hyjlindëse, ty të madhërojmë.

Varg: Se tek unë bëri vepra madhështore i Fuqishmi dhe i shenjtë është emri i tij; dhe përdëllimi i tij do të jetë brez pas brezi për ata që ia kanë frikën.

Më të nderuarën se Keruvimet dhe më të lavdëruarën pa krahasim se Serafimet, që pa u cenuar linde Fjalën Perëndi, me të vërtetë Hyjlindëse, ty të madhërojmë.

Varg: Rrëfeu fuqi me krahun e tij; i shpërndau ata që krenohen me mendimin e zemrës së tyre.

Më të nderuarën se Keruvimet dhe më të lavdëruarën pa krahasim se Serafimet, që pa u cenuar linde Fjalën Perëndi, me të vërtetë Hyjlindëse, ty të madhërojmë.

Varg: Përmbysi të fuqishmit prej froneve, dhe i lartësoi të përulurit, të uriturit i mbushi me të mira, dhe të pasurit i dëboi të zbrazët.

Më të nderuarën se Keruvimet dhe më të lavdëruarën pa krahasim se Serafimet, që pa u cenuar linde Fjalën Perëndi, me të vërtetë Hyjlindëse, ty të madhërojmë.

Varg: Përkrahu të birin e tij Izrael, duke sjellë ndër mend mëshirën që u premtoi etërve tanë, Abrahamit dhe farës së tij për jetë.

Më të nderuarën se Keruvimet dhe më të lavdëruarën pa krahasim se Serafimet, që pa u cenuar linde Fjalën Perëndi, me të vërtetë Hyjlindëse, ty të madhërojmë.

Lavdërimet

Psalmi 148

Lavdërojeni Zotin prej qiejve, lavdërojeni në më të lartat. Ty të ka hije himni, o Perëndi.

Lavdërojeni gjithë engjëjt e tij, lavdërojeni gjithë fuqitë e tij. Ty të ka hije himni, o Perëndi.

Lavdërojeni atë, o diell dhe hënë; himnojeni atë gjithë yjet dhe drita.

Lavdërojeni atë, o qiejt e qiejve, dhe uji përmbi qiejt.

Le të lavdërojmë emrin e Zotit, se ai tha dhe u bënë, ai porositi dhe u ndërtuan.

I forcoi në jetë të jetëve; vuri kufi, dhe nuk do ta kapërcejnë.

Lavdëroni Zotin nga toka, ju përbindsha deti dhe gjithë humnera.

Zjarr, breshër, borë, akull, erë stuhie që zbatojnë fjalën e tij.

Malet dhe kodrat të gjitha, drurë frutdhënës dhe kedra të gjithë.

Egërsirat dhe gjithë kafshët, zvarranikë dhe zogj fluturues.

Mbretër të tokës dhe popuj të gjithë, prijës dhe gjithë gjykatësit e tokës.

Djem dhe vajza, pleq dhe të rinj, le të himnojnë emrin e Zotit; se vetëm emri tij u lartësua.

Lavdërimi i tij është mbi tokë e në qiell, dhe do të lavdërojë ballin e popullit të vet.

Himn për gjithë oshënarët e tij, bijtë e Izraelit, popullit që i rri pranë.

Psalmi 149

Këndojini Zotit këngë të re, himnimi i tij është në mbledhjen e oshënarëve.

U dëfreftë Izraeli për atë që e bëri, dhe për mbretin e tyre le të dëfrejnë bijtë e Sionit.

Le ta lavdërojmë emrin e tij me valle, le t’i psalim atij me timpan e me psaltir.

Se Zoti e pëlqeu popullin e vet, dhe do të shpëtojë të butët, duke i ngritur lart ata.

Le të mburren të drejtët me lavdi, dhe le të ngazëllohen mbi shtretërit e vet.

Në gojën e tyre lavdërimet e Perëndisë, dhe në duart e tyre shpata me dy presa.

Për të marrë shpagimin nga kombet e për t’u dhënë ndëshkime popujve.

Mbretërit e tyre për t’i lidhur me vargonj dhe fisnikët e tyre me pranga hekuri.

Për të bërë mbi ta gjykim të shkruar; kjo është lavdi që do të kenë gjithë oshënarët e tij.

Psalmi 150

Lavdërojeni Perëndinë në shenjtoren e tij, lavdërojeni atë në vendin e shkëlqimit të fuqisë së tij.

Lavdërojeni për fuqitë e tij; lavdërojeni sipas madhërisë së tij të shumtë.

Lavdërojeni me zë trumpete; lavdërojeni me harpë dhe me kitarë.

Lavdërojeni me timpan dhe valle; lavdërojeni me kordha dhe instrumente.

Lavdërojeni me cimbale tingëlluese, lavdërojeni me cimbale brohoritjeje.

Çdo frymë le të lavdërojë Zotin.

Dhoksologjia e vogël

Ty të ka hije lavdi, o Zot Perëndia ynë, dhe Ty ta dërgojmë lavdinë, Atit, Birit edhe Shpirtit të Shenjtë, tani e përherë e në jetë të jetëve. Amin.

Lavdi Perëndisë që është në më të lartat dhe mbi dhenë paqe dhe mbi njerëzit mirëdashje.

Të himnojmë, të bekojmë, të falemi, të lavdërojmë, Ty të falënderojmë për lavdinë tënde të madhe.

Zot Mbret, Perëndi qiellor, Atë i tërëfuqishëm; Zot, Bir i Vetëmlindur Jisu Krisht, edhe Shpirti i Shenjtë.

Zot Perëndi, qengj i Perëndisë, Bir i Atit që ngre mëkatin e botës, mëshirona, Ti që ngre mëkatet e botës.

Prano lutjen tonë, Ti që rri në të djathtë të Atit, edhe mëshirona.

Se Ti je shenjt i vetëm, Ti je Zot i vetëm Jisu Krishti, për lavdi të Perëndisë Atit. Amin.

Për ditë do të të bekoj, dhe do të lavdëroj  Emrin tënd për jetë e në jetë të jetës.

O Zot, u bëre streha jonë brez pas brezi, unë thashë: O Zot mëshiromë, shëro shpirtin tim, se fajtova te Ti.

O Zot, te Ti gjeta strehë, mësomë të bëj dëshirën tënde, se Ti je Perëndia im.

Se pranë teje është burimi i jetës; me dritën tënde do të shohim dritë.

Zgjate përdëllimin tënd mbi ata që të njohin.

Bëna të denjë, o Zot, që të ruhemi këtë ditë pa ndonjë mëkat.

I bekuar je, o Zot, Perëndi i Etërve tanë, dhe emri yt është i himnuar dhe i lavdëruar në jetët. Amin.

Le të jetë, o Zot, përdëllimi yt mbi ne, sikurse kemi shpresuar te Ti.

I bekuar je, o Zot, mësomë porositë e tua. 

I bekuar je, o Zot, bëmë të mençëm në porositë e tua.

I bekuar je, o i Shenjtë, ndriçomë me porositë e tua.

O Zot, mëshira jote është për jetë, mos i hiq sytë nga veprat e duarve të tua.

Ty të ka hije lëvdata, Ty të ka hije himni, Ty të ka hije lavdia, Atit e Birit edhe Shpirtit të Shenjtë, tani e përherë e në jetë të jetëve. Amin.

U mbushëm në mëngjes me përdëllimin tënd, o Zot, dhe ngazëllyem e dëfryem gjithë ditët tona.

Dhe shkëlqimi i Zotit, Perëndisë tonë, qoftë mbi ne, dhe veprat e duarve tona drejtoi te ne, dhe veprën e duarve tona drejtoje.

Është mirë të lavdëroj Zotin, dhe t’i psal emrit tënd, o i Shumëlartë, të shpall përdëllimin tënd në mëngjes, dhe të vërtetën tënde çdo natë.

O Krisht, drita e vërtetë, që ndriçon dhe shenjtëron çdo njeri që vjen në botë, u shënoftë mbi ne drita e fytyrës sate, që të shikojmë në të dritën e paafrueshme; dhe drejto përçapjet tona në veprimet e porosive të tua; me ndërmjetimet e Nënës sate të pacenuar dhe të gjithë shenjtorëve të tu. Amin.

Leximet e ditës nga Dhiata e Re sipas Kalendarit Kishtar

Me uratat e Etërve tanë të shenjtë, o Zot Jisu Krisht Perëndi, mëshirona dhe shpëtona. Amin.