Gëzohu gjithmonë në Zotin

SHERBESA E TIPIKOVE

Psalmi 102

Beko Zotin, o shpirti im.

I bekuar je o Zot.

- Ting. Tërthor IV –

1.      Beko Zotin, o shpirti im, edhe ti, o zemra ime, emrin e tij të shenjtë.

2.      Beko Zotin, o shpirti im, dhe mos harro tërë mirësitë e tij.

3.      Atë që fal gjithë paudhësitë e tua, atë që shëron gjithë sëmundjet e tua.

4.      Atë që shpëton jetën tënde prej prishjes, atë që të kurorëzon me mëshirë dhe dhembshuri.

5.      Atë që ta mbush dëshirën me të mira; atë që përtërit të ritë e tu si të shqiponjës.

6.      Zoti tregon mëshirë dhe u jep të drejtë atyre që u bëhet padrejtësi.

7.      Ia bëri të njohura udhët e tij Moisiut, dëshirat e tij bijve të Izraelit.

8.      Zoti është i dhembshur dhe përdëllyes, zemërgjerë e mëshirëplotë.

9.      Nuk zemërohet përgjithmonë, as mban mëri për jetë.

10.  Nuk veproi sipas paudhësive tona, as na e shpërbleu sipas mëkateve tona.

11.  Sa e madhe është lartësia e qiellit nga dheu, aq e madhe është mëshira që tregon Zoti për ata që ia kanë frikën.

12.  Sa larg është lindja nga perëndimi, aq i largoi prej nesh paudhësitë tona.

13.  Sikurse atit i dhimbsen të bijtë, ashtu edhe Zotit i dhimbsen ata që ia kanë frikën.

14.  Se ai e di se jemi krijuar dhe sjell ndërmend se jemi baltë.

15.  Ditët e njeriut janë si bari, lulëzon porsi lulja e fushës.

16.  Se fryn era mbi të dhe s’është më dhe nuk dihet më se ku e ka pasur vendin.

17.  Po mëshira e Zotit, jetë pas jete, është mbi ata që ia kanë frikën, dhe drejtësia e tij mbi bijtë e bijve.

18.  Që ruajnë dhiatën e tij dhe që mbajnë ndër mend porositë e tij për t’i zbatuar.

19.  Zoti e vendosi fronin e tij në qiell, dhe mbretëria e tij zotëron mbi të gjithë.

20.  Bekoni Zotin gjithë ju engjëjt e tij, të fortë nga fuqia, që zbatoni porositë e tij, duke dëgjuar zërin e fjalëve të tij.

21.  Bekoni Zotin gjithë ju fuqitë e tij, ju shërbyesit e tij, që zbatoni dëshirën e tij.

22.  Bekoni Zotin gjithë ju veprat e tij, në çdo vend të sundimit të tij, beko Zotin, o shpirti im.

- Ting. II -

Lavdi Atit e Birit edhe Shpirtit të Shenjtë

Psalmi 145

1.     Lavdëro Zotin, o shpirti im;

2.     Do të lavdëroj Zotin deri sa të rroj; do t’i psal Perëndisë tim, deri sa të jem gjallë.

3.     Tek prijësit mos shpresoni, as në bij njerëzish, nga të cilët s’vjen shpëtim.

4.     Atij shpirti i del, dhe kthehet në dhe të vet; atë ditë do të humbin gjithë mendimet e tij.

5.     Lum ai që ka për ndihmës të vet Perëndinë e Jakobit, dhe shpresa e të cilit është tek Zoti, Perëndia i tij.

6.     Që bëri qiellin dhe tokën, detin dhe gjithë sa janë në to; që në jetë të jetëve ruan të vërtetën,

7.     Që drejtësi u bën atyre që u është bërë padrejtësi, që të uriturve u jep ushqim. Zoti liron robërit;

8.     Zoti u hap sytë të verbërve; Zoti ngre të rënët; Zoti do të drejtët;

9.     Zoti ruan prozelitët; do të mbrojë jetimin dhe vejushën, dhe do të zhdukë udhën e mëkatarëve.

10.                        Zoti do të mbretërojë në jetë të jetëve; Perëndia yt, o Sion, brez pas brezi.

Tani e përherë e në jetë të jetëve. Amin

O vetëmlindur Bir dhe Fjalë e Perëndisë, që je i pavdekshëm, dhe dënjove për shpëtimin tonë të trupëzohesh prej Hyjlindëses së shenjtë dhe gjithmonë Virgjërës Mari, duke u bërë njeri pa ndryshuar; që u kryqëzove, o Krisht Perëndi, dhe shkele vdekjen me vdekje, që je një prej Trinisë së Shenjtë dhe lavdërohesh bashkë me Atin dhe me Shpirtin e Shenjtë, shpëtona.

Lumërimet

- Ting. Tërthor IV –

Në mbretërinë tënde kujtona, o Zot, kur të vish në mbretërinë tënde.

Lum të varfërit në shpirt, sepse e tyrja është mbretëria e qiejve.

Lum ata që vajtojnë, sepse ata do të ngushëllohen.

Lum ata që janë të butë, sepse ata do të trashëgojnë dhenë.

Lum ata që kanë uri e etje për drejtësinë, sepse ata do të ngopen.

Lum ata që janë përdëllimtarë, sepse ata do të përdëllehen.

Lum ata që kanë zemër të pastër, sepse ata do të shohin Perëndinë.

Lum ata që bëjnë paqe, sepse ata do të quhen bij Perëndie.

Lum ata që ndiqen për punë drejtësie, sepse e tyrja është mbretëria e qiejve.

Të lumtur jeni ju, kur t’ju poshtërojnë e t’ju përndjekin, e të thonë kundër jush çdo lloj fjale të keqe me gënjeshtra për shkakun tim.

Gëzohuni e gazmohuni, sepse paga juaj është e shumtë në qiej.

Kujtona, o Zot, kur të vish në mbretërinë tënde.

Kujtona, o Kryezot, kur të vish në mbretërinë tënde.

Kujtona, o i Shenjtë, kur të vish në mbretërinë tënde.

Kori qiellor të himnon dhe thotë: Shenjt, Shenjt, Shenjt, Zoti Sabaoth, qielli e dheu janë plot me lavdinë tënde.

Ejani tek ai dhe ndriçohuni;

Dhe fytyrat tuaja nuk do të turpërohen.

Kori qiellor të himnon dhe thotë: Shenjt, Shenjt, Shenjt, Zoti Sabaoth, qielli e dheu janë plot me lavdinë tënde.

Lavdi Atit e Birit edhe Shpirtit të Shenjtë

Kori i engjëjve dhe kryeengjëjve të shenjtë, bashkë me të gjithë fuqitë qiellore të himnon dhe thotë: Shenjt, Shenjt, Shenjt, Zoti Sabaoth, qielli e dheu janë plot me lavdinë tënde.

Tani e përherë e në jetë të jetëve. Amin

Besoj në një Perëndi, Atë të tërëfuqishëm, krijues të qiellit dhe të dheut dhe të gjithë të dukurave dhe të padukurave.

Dhe në një Zot, Jisu Krishtin, Birin e Perëndisë, të vetëmlindurin, që lindi prej Atit përpara gjithë shekujve. Dritë prej drite, Perëndi të vërtetë, prej Perëndie të vërtetë, të lindur, jo të bërë, që ka të qenët një me Atin, me anën e të cilit u bënë të gjitha.

Që për ne njerëzit zbriti prej qiejve, dhe u trupëzua prej Shpirtit të Shenjtë të Virgjëreshës Mari dhe u bë njeri.

Dhe u kryqëzua për ne në kohën e Pontit Pilat, dhe pësoi dhe u varros.

Dhe u ngjall të tretën ditë sipas Shkrimeve.

Dhe u ngji në qiejt dhe rri në të djathtë të Atit.

Dhe do të vijë përsëri me lavdi të gjykojë të gjallët dhe të vdekurit, mbretëria e të cilit nuk do të ketë mbarim.

Dhe në Shpirtin e Shenjtë, Zot, jetëbërës, që buron prej Atit, që adhurohet e lavdërohet bashkë me Atin e me Birin, që foli me anën e profetëve.

Në një kishë të shenjtë, katholike dhe apostolike.

Pohoi një pagëzim për ndjesën e mëkateve.

Pres ngjalljen e të vdekurve.

Dhe jetën e ardhshme të amëshuar. Amin.

O Perëndi, lër, fal, shkeljet tona, të vullnetshme e të pavullnetshme, me vepra e me fjalë, me dije e pa dije, natën e ditën, me mendje e me mendime; falnai të gjitha, si i mirë dhe njeridashës.

Ati ynë që je në qiejt, u shenjtëroftë emri yt, ardhtë mbretëria jote, u bëftë dëshira jote si në qiell ashtu edhe mbi dhe. Bukën tonë të përditshme jepna neve sot; dhe falna fajet tona, sikurse edhe ne ua falim fajtorëve tanë; dhe mos na shtjer në ngasje, por shpëtona nga i ligu.

Se jota është mbretëria dhe fuqia dhe lavdia, e Atit, e Birit dhe e Shpirtit të Shenjtë, tani e përherë e në jetë të jetëve.

Pastaj psalim shkurtoret:

e Metamofozës – Ting. i Rëndë.

Përmbi malin ndrrove fytyrën, dhe ua shfaqe lavdinë tënde dishepujve, o Krisht Perëndi siç e merrnin vesh, dhe kështu kur të panë përmbi kryq pastaj, kuptuan që ishte një pësim vullnetar, dhe lëçitnë kudo mbi dhe, se ti je vërtet o Zoti Krisht, agullimi i Atit.

Mbrojtje e  paturpëruar e të krishterëve, ndërmjetim i pandërprerë ndaj krijuesit, dëgjo zërat e lutjeve të mëkatarëve, dhe arri si e mirë për të na ndihmuar ne që të thërresim me besë, nxito të ndërmjetosh dhe shpëto të lutesh, o Hyjlindëse, që mbron ngaherë ata që të nderojnë.

Mëshiro, o Zot. (40 herë)

Emri i Zotit qoftë i bekuar që tani e gjer në jetët. (3 herë)

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Psalmi 33

1.      Do të bekoj Zotin në çdo kohë; lavdërimi i tij do të jetë gjithnjë në gojën time.

2.      Shpirti im do të lavdërohet me Zotin; le të dëgjojnë të butët dhe le të ngazëllohen.

3.      Madhëroni Zotin bashkë me mua dhe bashkë le të lartësojmë emrin e tij.

4.      Kërkova Zotin dhe më dëgjoi; dhe nga të gjithë hidhërimet më shpëtoi.

5.      Ejani tek ai dhe ndriçohuni; dhe fytyrat tuaja nuk do të turpërohen.

6.      I varfëri thirri dhe Zoti e dëgjoi, dhe e shpëtoi nga të gjithë hidhërimet e tij.

7.      Engjëlli i Zotit do të qëndrojë rreth atyre që ia kanë frikën dhe do t’i shpëtojë.

8.      Shijoni dhe shihni se Zoti është i mirë; lum ai njeri që ka shpresë te ai.

9.      Kini frikë nga Zoti, ju, shërbëtorët e tij; se nuk do t’u mungojë gjë atyre që ia kanë frikën.

10.  Të pasur janë varfëruar dhe janë urëtuar, po atyre që kërkojnë Zotin nuk do t’u mungojë asnjë e mirë.

11.  Ejani o bij, dëgjomëni, frikën e Zotit do t’ju mësoj.

12.  Cili është ai njeri që e do jetën dhe dëshiron të shohë ditë të mira?

13.  Le të ruajë gjuhën prej së keqes edhe buzët që të mos flasin dredhira.

14.  Le të largohet nga e keqja dhe të bëjë të mirën, të kërkojë paqen dhe ta arrijë atë.

15.  Sytë e Zotit janë mbi të drejtët dhe veshët e tij janë gati të dëgjojnë lutjet e tyre.

16.  Fytyra e Zotit është kundër atyre që bëjnë keq, ka për të zhdukur prej faqes së dheut kujtimin  tyre.

17.  Thirrën të drejtët dhe Zoti i dëgjoi, dhe nga gjithë hidhërimet e tyre i shpëtoi.

18.  Zoti është afër atyre që janë me zemër të thyer; dhe ata që janë me frymë të përulur do t’i shpëtojë.

19.  Të shumta janë hidhërimet e të drejtëve; dhe nga të gjitha do t’i shpëtojë Zoti.

20.  Ruan eshtrat e tyre dhe asnjë prej këtyre nuk do të thyhet.

21.  Vdekja e mëkatarëve do të jetë e keqe; dhe ata që urrejnë të drejtin do të bëjnë faj.

22.  Zoti do të shpëtojë shpirtrat e shërbëtorëve të tij dhe nuk do të bien në faje gjithë ata që kanë shpresë tek Ai.

Përlëshimi

Lavdi më ty, o Krisht Perëndi, shpresa jonë, lavdi më Ty.

Lavdi Atit e Birit edhe Shpirtit të Shenjtë, tani e përherë e në jetë të jetëve. Amin.

Mëshiro, o Zot. (3 herë) Beko, o Atë i shenjtë.

Krishti Perëndia ynë i vërtetë, me ndërmjetimet e Nënës së tij të pacënuar dhe krejt të papërlyer dhe të shenjtë, të lavdëruarit, profetit, pararendësit dhe pagëzorit Joan; të Apostujve të shenjtë, të lavdëruar dhe të dëgjuar; të etërve tanë oshënarë dhe hyjprurës; të shenjtit (të kishës); të hyjprindërve të shenjtë dhe të drejtë Joakim dhe Anës; të shën (të ditës), kujtimin e të cilit kremtojmë sot, dhe të gjithë shenjtorëve, na mëshiroftë dhe na shpëtoftë si Perëndi i mirë, njeridashës dhe mëshirues.

Me uratat e Etërve tanë të shenjtë, o Zot Jisu Krisht, Perëndi, mëshirona dhe shpëtona.

Marku 11:22-25 & Mattheu 7:7-8

22.Edhe Jisui u përgjigj, e u tha atyre: Kini besim në Perëndinë,

23.sepse me të vërtetë po ju them juve, se kush t’i thotë këtij mali: Ngrihu dhe hidhu në det, dhe të mos ketë dyshim në zemrën e tij, por të besojë se sa thotë bëhen, do t’i bëhet atij çdo gjë që të thotë.

24.Prandaj po ju them juve, gjithë sa të lypni duke u falur, besoni se do t’i merrni, dhe do t’ju bëhen juve.

25.Edhe kur të rrini të faleni, ndjeni, në paçi gjë kundër ndonjërit, që edhe Ati juaj që është në qiejt t’ju ndjejë juve fajet tuaja.

Mt. 7:7-8

7. Lypni, dhe do t’ju jepet; kërkoni dhe do të gjeni; trokitni, dhe do t’ju hapet.

8. Sepse kushdo që lyp merr, dhe ai që kërkon gjen, dhe atij që troket do t’i hapet.

Mattheu 7:7-11

7. Lypni, dhe do t’ju jepet; kërkoni dhe do të gjeni; trokitni, dhe do t’ju hapet.

8.Sepse kushdo që lyp merr, dhe ai që kërkon gjen, dhe atij që troket do t’i hapet.

9.Apo cili është ai njeri nga ju, i cili, në lyptë i biri bukë, do t’i japë atij gur?

10. edhe në lyptë peshk, mos do t’i japë atij gjarpër?

11. në qoftë pra se ju që jeni të ligj dini t’u jepni gjëra të mira bijve tuaj, sa më tepër Ati juaj që është në qiejt do t’u japë të mira atyre që lypin nga ai?

 Lutje që mund të përsëritet shumë herë në ditë:

·         O Zot, Perëndi, që je edhe që ishe edhe që vjen, i Gjithëpushtetshëm, lavdi më ty. (Zbul. 1:8)

·         O Zot Jisu Krisht, Biri i Perëndisë, mëshiromë mua mëkatarin. (Llk. 18:13,39)

O Zot Jisu Krisht, Biri i Perëndisë, mëshiromë mua mëkatarin.

O Zot Jisu Krisht, Biri i Perëndisë, mëshirona ne dhe gjithë botën.

·         O Shpirt i Tërëshenjtë, jepmë mua frutin tënd: dashuri, gëzim, paqe, zemërgjerësi, ëmbëlsi, mirësi, besim, butësi dhe vetëpërmbajtje. (Gal. 5:22).