Krishti lindi!
Lavdërojeni Atë!
Krishti lindi, lavdërojeni
Atë!
Krishti vjen nga qielli,
shkoni ta takoni!
Krishti është në tokë,
lartësohuni!
Këndojini Zotit gjithë toka!
Le të gëzohen qiejtë dhe le
të ngazëllohet toka!
Errësira është larguar dhe
kudo është bërë dritë.
Njerëzit që qëndrojnë në
errësirë, le të shikojnë dritën e madhe të Njohjes së Plotë. Ai që është pa
trup është mishëruar.
Biri i Perëndisë bëhet Biri i
njeriut. Jisu Krishti – i njëjtë dje dhe sot dhe përgjithmonë!
Le të flasim për festën, e
cila është quajtur Lindja e Zotit dhe e Shpëtimtarit tonë Jisu Krisht. Për këtë
arsye ne po kremtojmë sot ardhjen e Perëndisë në njerëzim, që njerëzimi të mund
të kthehet tek Perëndia. Le të zhveshim natyrën tonë të vjetër që të mund të
veshim të renë. Le të vdesim me Adamin, që
të jetojmë në Krishtin. Le të lindim me Krishtin, gjithashtu të
kryqëzohemi dhe të varrosemi me Të, që edhe të ngjallemi me Të, sepse Ai që
është i pasur u bë i varfër.
Ai pranoi varfërinë e mishit
tim, që unë mund të pranoj pasuritë e hyjnisë së Tij. Ai që është plot zbraz
vetveten prej lavdisë së Tij, që unë mund të marr pjesë në plotësinë e Tij.
Prandaj, le të kremtojmë festën, jo sipas mënyrës së festave pagane, por sipas
mënyrës së Perëndisë. Ne që jemi adhurues të Fjalës së Perëndisë, le të
meditojmë mbi Fjalën dhe mbi Ligjet e Tij si edhe mbi tregimet Biblike të cilat
na tregojnë për festën e tanishme. Sa e pasur është mirësia e Tij!
Ç’është ky mister që ndodhet
rreth meje?! Ai tani merr pjesë në mishin tim, që të mund të ruajë imazhin dhe
ta bëjë të pavdekshëm mishin tim. Nëpërmjet mishërimit Ai na afron një bashkim
të dytë, i cili është më i mrekullueshëm se bashkimi i Tij i parë me krijimin,
sepse në krijim Ai na dha një pjesë të natyrës së Tij të mirë, ndërsa tani në
Lindje Ai mori mbi Veten e tij natyrën tonë mëkatare.
Lindja është vepër Perëndie.
Ajo është shumë e lartë për
sytë e kuptimit të të gjithë njerëzve.
Krishti lindi, ngazëllohuni o
popuj!
Shën Grigor Theologu
